Auf mehrfachen Wunsch veröffentlichen wir hier das Gedicht von Richard Pfeifer zum 70. Geburtstag von Pfarrer Gerhard in Textform und als PDF:
As earscht Mål 70
Dös haßt ma håld guat kalkuliert:
Wenn ´d Kiarcha gråd 300 wiard,
setzascht du da Tupf af d´s i
vom salla anno domini.
Wenn schua d´s Haus 300 wiard,
warsch röcht und guat, wenn o dr Wiart
an rundara Geburtståg hat –
muascht gråd luaga, wia åbdraht!
Br Kppla bischt fir mi dr earscht,
wia no niamad våar dir hearscht
zum 70er heind greimti Schtrofa –
as nägscht Mål 80 – ma konn jå hoffa!
Miar zwåa kenna ins schua long –
wenn i amål aso onfong –
seidr insram Schtudium
ischt guat a hålbs Jåhrhundert um.
Am böschta homm´r zamagfunda
im Seminar b´r Sängrrunda.
Oft und geara homm´r gsunga,
und du håscht dört schua göttli klunga!
Du bischt – i nit – denn Geischtli gwåara,
drum homm´r ins as am Og vrlåara;
håba agni Wög beschritta
und sichr bead nit druntr glitta.
A´f zmål håscht mit´m Ulli Obris(ch)t
umateischlat, und aso bischt
wiedr auftaucht – insr Pfårr –
i hon gmant, i wiar an Nårr.
Plötzli schteat dr Gerhard Haas
wiedr våar mr, und i waß,
in dr Kiarcha wiard iatz gsunga,
ear håt jå friar schua himmlisch klunga.
So isch denn köma, und ischt röcht
(o wenn ma´s mangs Mål ondrscht möcht);
a 6. und drauf noch 2 Schtropha
sei drzua ka Kataschtropha.
Odr ischt dr Chor bam Singa,
konnscht´n leicht durnondr bringa,
öppas ausgmåcht ischt jå glei,
und döcht muaß ma flexibl sei!
I hon iatz gnua´ grödt ibr ds Singa,
o in viel ondram will´s dr glinga,
ins bam Chrischtsei hilfreich z´ sei,
sis war glei Schluss – aus und vorbei.
I hon schua aso on Zweifl z´ leida,
drum bischt fir mi a bissli z´ bneida:
du schteascht gonz aufröcht zu deim Globa,
gråd fir assall muaß i di loba.
Du witt mit ins an Sunnti feira,
und d´ Möss nit afåch åchaleira;
fir di bewegada Gedonka
ba jed´m Schtearbfåll låss dr donka.
Und gonz afåch „galt´sgott“ såga
will i fi dei rödlis Plåga,
dei Huat no gleim b´r Schtonga z´ hålta,
und seias döcht ålli di Ålta.
Bischt o nu Mensch, assall zum Glick,
sis gab´s jå går kan Ogablick,
wo a mi nu wundra konn
ibr insran Gottesmonn.
As konn i nömli schlöcht vrschtia:
Di Kiarchauhr geaht geara z´ fria,
gråd denn, wenn d´ Kiarcha losgia sött –
Zeit hat i schua – wenn i gråd wött!
Wia ba ålla Gotteskindr
geit ´s o ba dir Guats und as Mindr;
i will drzua ka Wåart vrliara,
nu – fåhr nia Auto ohna … Gurt!
Wölla håscht af Kåppla köma,
und nit no mia drzua baköma.
Jå konnscht d´r denka – aus der Traum!
Iatz håscht an mords Seelsorgeraum.
I muass mi wundra, ´ass dös geaht
mit drei Pfårreia – a tolls Gneat;
åbr du måchasch wirkli guat –
Lob und Donk – i zuich da Huat!
Miar isch längscht gona, so wia dir,
i hon da Siebazgr hintr mir.
Zum Tråascht, våar i iatz wiedr gea:
Ear tuat am wianigschtens nit weah!
I Rentnr hon – bei Gott – leicht låcha,
und såga, du söttscht weitrmåcha.
Egal wia´s kinnt, af jedn Fåll
da Söga Gottes – vo ins åll!!!
Zum 70er unseres Pfarrers Mag. Gerhard Haas
im Jubiläumsjahr (300) der Pfarrkirche St. Antonius
Juni 2026
(Richard Pfeifer)
